តូក្យូ៖ នាយកប្រតិបត្តិក្រុមហ៊ុន Toyota លោក Ichiro KASHITANI បានជម្រាបនាយករដ្ឋមន្ត្រីកម្ពុជាថារោងចក្រដំឡើងរថយន្ត Toyota នឹងបើកនៅកម្ពុជានៅពាក់កណ្ដាលឆ្នាំ២០២៤ ខាងមុខ។

ការបញ្ជាក់នេះធ្វើឡើងក្នុងពេលដែលលោកជួបប្រជុំជាមួយនាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត ក្នុងពេលដែលសម្ដេចធិបតីមានវត្តមានក្នុងប្រទេសជប៉ុនចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០។

ក្នុងជំនួបនោះលោក Ichiro KASHITANI បានអរគុណចំពោះរាជរដ្ឋាភិបាលកម្ពុជា ដែលបានបង្កលក្ខណៈគ្រប់បែបយ៉ាងចំពោះដំណើរការអាជីវកម្មរបស់ក្រុមហ៊ុន ឱ្យដំណើរការដោយរលូន និងបានជំរុញទឹកចិត្តដល់វិនិយោគិនឱ្យកាន់តែមានទំនុកចិត្តក្នុងការពង្រីកការវិនិយោគរបស់ខ្លួននៅកម្ពុជា។

លោកថានៅពាក់កណ្ដាលឆ្នាំ២០២៤ ខាងរោងចក្រតំឡើងរថយន្តរបស់ខ្លួននឹងបើកសម្ពោធជាផ្លូវការ។

នាយករដ្ឋមន្ត្រី សម្តេចធិបតី ហ៊ុន ម៉ាណែត បានលើកទ្បើងថាសម្ដេចនឹងអញ្ជើញជាអធិបតីក្នុងពិធីសម្ពោធរោងចក្រនាពេលខាងមុខផងដែរ ខណៈដែលការសម្ពោធនេះស្របពេលទៅខួបអនុស្សាវរីយ៍លើកទី៧១ នៃទំនាក់ទំនងការទូតកម្ពុជា-ជប៉ុន។

ក្នុងជំនួបនោះដែរ សម្តេចធិបតី បានសម្តែងនូវភាពជឿជាក់ថា តាមរយៈដំណើរការនៃរោងចក្រតំទ្បើងរថយន្ត Toyota នឹងនាំមកនូវវឌ្ឍនភាពរីកចម្រើនសម្រាប់ក្រុមហ៊ុន ក៏ដូចជាការបង្កើតឱកាសការងារប្រកបដោយគុណភាព និងការបណ្តុះបណ្តាលលើកកម្ពស់ថែមទៀតលើជំនាញវិស្វកម្មរថយន្ត សម្រាប់ប្រជាជនកម្ពុជាផងដែរ៕